CLICK HERE FOR BLOGGER TEMPLATES AND MYSPACE LAYOUTS »

الأربعاء، 5 مارس 2008

التوقيع / فاعلة خير


جاءنا البيان التالي : ـ

السادة والسيدات من البلوجريين المحترمين والمحترمات

نحيطكم علماً بأن المدعو سكر المصري ربنا يخليه لينا يارب

ويرجع لنا بهديه كبيره من سفرية ليبيا

وعشان خاطر سكر نخليها ( سفرية ايطاليا ) لاحسن ثكر مكسوف اوي من موضوع ليبيا دي

اكنها دايسه له على طرف

ويارب يكون مقدر الجمايل دي وعلى الله ينسى الهدية بتاعتي هطلع عنيه

ثكر بيقول لكم انه هيغيب عنكم لمدة 15 يوم فقط لا غير عدا ونقدا

وذلك لاسباب متعلقه بـ امممممممممممممم

بسفره لمناقشه الاوضاع البلوجريه بايطاليا (اللي هي ليبيا سابقاً )

وهو بيطمنكم على صحة الوالد الحبيب ربنا يبارك لنا في عمره

قولوا آمين يختي انتي وهي

وطبعا كلكم محتارين مين العسل والثكر

والشربات ( في شدة على الراء خدي بالك يختي انت وهي وانتم بتقروها ) اللي بتكتب الاعتذار دا

وانا طبعا عشان طيبه وقلبي ونيتي صافيين جداااااااا

وما يهونشي عليا اني اطفش المعجبات من ايد ثكر ويزعل ويتمقص وياخد على خاطره مني

مش هقدر ااقولكم اني مراته التانيه .. ابدا مهما حاولتم ومهما كانت الاغراءات والعروض .

وفي انتظار طبعا خناقاتكم وشباشبكم وايميلاتكم على ايميل المغفور له مقدما أحمد ثكر ..

ويلا باااي بئه الحق احبس الكلمتين دول بكبايه شاي

هذا وسنوافيكم بالاخبار اول بأول ان شاء الله .....


التوقيع / فاعلة خير

الأحد، 2 مارس 2008

زياره للوالد (دعواتكم بالشفاء العاجل له)


1- اتصال تليفونى بوالدتى
==================
اليوم وانا بالعمل وكاعادتى اليوميه باتصالى بوالدتى للاطمئنان عليهم
وجدت ان صوتها متغير بعض الشىء فى ايه ياماما مالك
قالتلى مفيش المهم بعد اصرار والحاح قالتلى ان بابا تعبان من يومين
قلتلتها ما انا بتصل كل يوم مش قلتيلى ليه؟
قالتلى عارفين ظروف شغلك فى المطار
محبيناش نتعبك المهم قلتلها انا جاى حالا وفعلا اخذت اذن من الشغل وذهبت لوالدى

قبل ذهابى اتصلت بزوجتى ان تسبقنى هى والاولاد
واتصلت بالدكتور حجزت عنده علشان اودى بابا عنده

=================================
2- لمسات ماما فى الاكل
طبعا اولادى وزجتى سبقونى عند بابا
وانا حصلتهم بعد كم ساعه كدا
وجاة وقت الغدا وما ادراك الغدا عند ماما
ومن ايديها
اممممممممممممممممم
الواحد مهما لف ومهما اكل ومهما غير من اصناف الاكل
يفضل طعم اكل مامته وريحته فى انفه الدهر كله
من اول مادخلت من باب البيت والريحه هفهفت فى انفى
فمنيت نفسى بغدوه من بتوع ايام زماااان
واتحطت السفره
واتحط الاكل وانا نزلت ع الاكل ايه
تقولش بقاله سنه ماكلشى
وانا باكل بئه بقول لماما ايه
ربنا يخليكى يا ماما
ربنا يحفظك يارب
الاكل يجنن
واااااااااااو ريحة الاكل لوحدها تشبع

وطبعا ام محمد (زوجتى) عماله تبصلى
وانا نازل مدح وشكر فى اكل ماما
الغريب ان ام محمد كانت بتبصلى وعلى شفتيها ابتسامه خبيثه هههههه
وانا ولا على بالى
نازل اكل وشكر فى اكل ماما
بعد مااكلت وقمت غسلت ايدى
قعدت جنب ماما وقلتلتها ادى الاكل ولا بلاش
لقيتهم كلهم انفجرو فى الضحك
بابا وماما واختى وزوج اختى واخين كمان ليا
طبعا انا مذمهل من ضحكهم المفاجىء تقولش انا قلت نكته
بصيت لماما ولقيتها مبتسمه بردو نفس ابتسامة ام محمد
هههههههههه
وطبطبت عليا وقالتلى عارف مين اللى عمل الاكل انهارده ؟؟؟؟
امممممممممم
قلتلها طبعا انتى ياحبيبتى
ضحكت وقالت لاء
دى ام محمد اللى عملت الاكل
!!!!!!!
انا بينى وبينكم تنحت
اذمهليت (الا يعنى ايه اذمهليت دى )
واتكسفت
ووشى ضرب احمرارا من حمرة الخجل
وهما عمالين يبصو عليا ومييتين من الضوحك
انا بينى وبين نفسى
قعدت افكر ودارت جويا الكلاموالاسئله دى
هى هى نفس الاصناف اللى بتعملها زوجتى فى البيت
وهى بردو اللى عملت الاكل هنا
وهى اللى بتعمل الاكل هناك
وهى اللى حطت السفره هنا
وهى الى بتجهز السفره هناك
طب ازاى الطعم مختلف
لاء دا اختلاف شاااسع
طب ايه السر ياترى
هل هو عبق المكان ؟؟
هل هو الحنين للمكان اللى اتربيت فيه وعشت فيه واكلت فيه ؟؟!!
هل فى سر انا معرفهوش ؟
وكأن مامتى بتقرأ افكارى
فردت وقالتلى
ياحبيبى دى اللمسات الاخيره
وانفجرو فى وصلة ضحك تانيه
يارب يخليكى ليا يامامتى ويديكى الصحه
=============================
3--عناد بابا ورفضه الذهاب للدكتور
بعد ما كلنا وهزرنا وضحكنا جت الساعه الحاسمه
الا وهى اقناع بابا ان يروح للدكتور
طبعا بابا كعاده عاند معايا
وبعد عذاب ومحايله علشان ينزل معايا نروح للدكتور
المهم رحنا للدكتور وفى انتظار التحاليل والاشعه
دعواتكم بالشفاء العاجل

=====================
4- على هامش الزياره
واحنا فى طريق عودتنا لفت نظرى بعض الاشياء
قد تكون مرت عليا سابقا بس المره دى مش عارف اخدت بالى منها ليه ؟؟؟
1-طفل عنده 7 سنين استوقفنى وقالى والنبى ياعمو والنبى ياعمو هات نص جنيه اجيب حاجه اكلهاااا
لا تعليق
2- امام محل للماكولات طفل عنده تقريبا 8 سنين قاعد امام المحل منتظر فتات الطعام
من بعض الزبائن علشان يأكله
لا تعليق
3- اما نفس المحل سياره فارهه تمنها تقريبا فوق النص مليون جنيه
وقاعد بجوارباباه طفل لا يتعدى عمره 8 سنين وطبعا مظاهر الرفاهيه ظاهره عليه
ونفس الطفل اللى مستنى فتات الطعام فى عنيه نظره فيها مليون سؤال
انا ليه كدا وهو ليه كدا ؟؟
ولو انا مكانه كنت هحس بايه ؟؟
ولو هو مكانى كان هيبقى شعوره ايه ؟؟
وازاى انا وصلت لكدا؟؟
وهو بقى كدا ازااى ؟؟
كل دى اسئله فى عيون الطفل المشرد
4- نفس الطفل اللى فى السياره الفارهه
ونفس الطفل اللى على الرصيف منتظر فتات الطعام
بس هنا فى حاجه جميله عجبتنى
الطفل اللى فى السياره الغاليه نزل منها وقسم سندوتشين
كانو معاه ادى سندوتش للطفل الغلبان
واخد التانى وركب العربيه
لا تعليق
=============================
5- الحضـــــــــــــــــــــــــرى
يادى الحضرى وسنينه اخدت اكتر من حجمها مشكلة الحضرى دى
كل حته حضرى كل مكان حضرى
وانا فى الشغل اغلب الزملا بيتكلمو عن الحضرى
وعن مشكلته دا مؤيد ودا معارض وانا بينى وبينكم بتخنق
من الحاجه اللى بتاخد اكتر من حجمها
سبت المكتب وقلت انزل عند الطياره لقيت بعض الركاب بيتكلمو عن الحضرى
نزلت تحت قلت اروح المجمع الادارى اعمل شوية شغل لقيتهم بيقولو حضرى
لاء بئه مبدهاش انا هروح
فى المواصلات حضرى
نزلت من الاتوبيس وقلت اركب ميكروباص
حظى العاثر ركبت جنب واحد ماسك جرنااال وبيقرأ مشكلة الحضرى
عصرت على نفسى ليمونه
وقلت استحمل بئه
نزلت وانا فى طريق البيت وماشى على رجلى لقيت اتنين ع القهوه بيتخانقو ويتكلمو فى موضوع الحضرى
سديت ودانى ومديت علشان اروح بسرعه
وصلت البيت وبفتح باب الشقه لقيت محمود ابنى بيقول هييييييييييييييييييه
جبت جوووون فى الحضرى
ههههههههههههههه
اتارى محمد كان واقف جون ومسمى نفسه الحضرى ومحمود بيشوط عليه الكوره
امممممممممممممممم سبتهم ودخلت من دون تعليق
قلت افتح التلفزيون وافك نفسى من الحضرى دا
هههههههههههه
لقيته ورايا ورايا
كل القنوات تقريبا مفيهاش سيره غير فيلم هروب الحضرى
قلت ااقعد شويه على جهاز الكومبيوتر وادخل النت
اول مافتحت الميل هههههههههه
لقيت استفتاء اصحابى باعتينه ليا
هل انت مع او ضد الحضرى !!!!!!!!!

وفعلا بقى فيلم الموسم هروب الحضرى
لاء ازاى تهرب من الحضرى
والى لقاء اخر
تحيااتى
احمد سكر
انتظر بلهفه تعليقاتكم